ALAW

Cwmni teuluol bychan yw ALAW, wedi ei reoli gan gerddorion proffesiynol profiadol, yn arbenigo yn bennaf mewn cerddoriaeth ar gyfer offerynnau pres a’r delyn a deunyddiau addysgol. Rydym yn sicrhau fod ein cynnyrch yn cael ei archwilio’n fanwl: mae’r holl eitemau yn ein catalog wedi cael eu perfformio gennym ni, yn ystod ein gwaith fel cerddorion, neu gan ein myfyrwyr. Yn bennaf oll, gwyddom y gallwn roi cyfle gwych i chi chwarae cerddoriaeth nad yw ar gael fel arfer i offerynwyr pres, tra gall telynorion fwynhau repertoire llawer iawn ehangach nag arfer, yn cynnwys amrywiaeth helaeth o alawon gwerin.

Ganed Valerie Aldrich-Smith yng Nghrughywel, Powys. Astudiodd am radd B.Mus. ym Mhrifysgol Birmingham cyn dilyn cwrs astudiaethau perfformio estynedig gyda Ann Griffiths yng Ngholeg Cerdd a Drama Cymru.
Ers 1981 hi yw Prif Delynores Cerddorfa Genedlaethol BBC Cymru. Yn ystod ei gyrfa fel telynores broffesiynnol mae hi wedi dysgu’r delyn mewn ysgolion, yn ei chartref, ym Mhrifysgol Cymru Caerdydd, yng Ngholeg Cerdd a Drama Cymru, yn ogystal â bod yn diwtor ar gyrsiau Telynau Morgannwg a Choleg Telyn Cymru. Fe’i hysbrydolwyd i gyfansoddi a threfnu cerddoriaeth yn sgil dysgu telynorion ifanc. Trwy gymeryd rhan blaenllaw yng Nghynllun Addysg BBCNOW mae hi wedi ymweld ag ysgolion i berswadio myfyrwyr i berfformio, cyfansoddi, a gwerthfawrogi cerddoriaeth; mae’r cynllun yn ran annatod o astudiaethau cerddorol Cyricwlwm Cenedlaethol Cymru.

Mae Eric Crees wedi bod yn aelod o Gerddorfa Symffoni Llundain (LSO) ers 1973, lle’r oedd yn gyd-brif drombôn. Yn 2000 ymunodd â Cherddorfa’r Ty Opera Brenhinol, Covent Garden fel prif drombôn. Mae Eric yn Athro yn Ysgol Gerdd a Drama Guildhall, Llundain ac mae’n un o’r arweinwyr a threfnwyr cerddoriaeth bres mwyaf ei fri. Yn Gyfarwyddwr Cerdd Offerynnau Pres Cerddorfa Symffoni Llundain, mae wedi gweithio gyda rhai o’r emsembles pres a bandiau pres gorau. Mae galw mawr am wasanaeth Eric yn rhyngwladol, fel arweinydd a hyfforddwr, ac mae wedi gweithio gyda phrif gerddorfeydd proffesiynol a ieuenctid ym Mhrydain, Gogledd Iwrddon, Denmarc, Norway, yr Iseldiroedd, Ffrainc, UDA a Japan. Fel addysgwr, mae’n chwarae rhan flaenllaw gydag Adran Addysg yr LSO yn ogystal ag Adran Perfformio a Chyfathrebu Ysgol Guildhall. Mae Eric Crees wedi cyfarwyddo llawer o brojectau addysgol, yn cynnwys un a gynhaliwyd yn Llundain, Paris a Fienna ochr yn ochr â Pierre Boulez.

 

Yn enedigol o Ogledd Cymru, Gillian oedd un o’r myfyrwyr cerddoriaeth cyntaf i astudio yn Ysgol Gerddoriaeth Chetham, Manceinion. Wedi graddio gyda B.Mus. o Brifysgol Cymru Caerdydd yn ogystal â chwrs uwchradd perfformio LTCL a Thystysgrif Uwch-Raddedig mewn Addysg, fe’i hapwyntiwyd yn diwtor Telyn ar gyfer Awdurdod Addysg Morgannwg Ganol. Bu’n dysgu’r delyn am 23 mlynedd yn Ysgol Gyfun Gymraeg Llanhari gan sefydlu Adran Delyn gadarn a llewyrchus. Yn ystod ei chyfnod yn dysgu hyfforddodd nifer fawr o gerddorion ifanc, rhai a lwyddodd i ddod yn delynorion proffesiynol. Trwy ei threfniannau a’i cherddoriaeth gomisiwn rhoddodd y cyfle i genhedlaethau o fyfyrwyr ganu gydag Ensemble Telyn Glissandi. Perfformiwyd y gerddoriaeth yma mewn nifer o neuaddau cyngerdd blaengar, megis Amgueddfa Cenedlaethol Cymru, Neuadd Dewi Sant yng Nghaerdydd, "Royal Festival Hall", "Queen Elizabeth Hall", ac yn Dresden. Datblygodd yr Ensemble hanes llwyddiannus yng nghystadleuthau Eisteddfod Genedlaethol Cymru. Erbyn hyn rhanna Gillian Green ei hamser rhwng canu’r delyn, boed mewn cyngherddau neu mewn achlysuron arbennig.

Mae Haldon Evans, trympedwr a darlithydd yng Ngholeg Abertawe, yn brysur â gwaith ar ei liwt ei hun yn ne Cymru. Astudiodd gyfansoddi yng Ngholeg y Brifysgol, Caerdydd lle enillodd radd B.Mus., a pharhau i astudio wrth draed Alun Hoddinot fel myfyriwr ôl-raddedig, gan ennill gradd M.Mus. Ysgogodd ei ymchwil manwl i dechnegau cyfansoddi Béla Bartok ef i archwilio posibiliadau cynhenid cerddoriaeth werin Cymru. Mae’n drefnydd hynod ddawnus ar gyfer offerynnau pres.

Ganed Skaila Kanga yn India a dechreuodd ddysgu canu’r piano yn bump oed. Dechreuodd ymddiddori yn y delyn yn 17 mlwydd oed pan gafodd gyfle i astudio gyda Tina Bonifacio, telynor Syr Thomas Beecham yn y Gerddorfa Ffilharmonig Frenhinol. Cychwynnodd ar ei gyrfa gyda Cherddorfa Gyngerdd y BBC ac aeth ymlaen i weithio ar ei liwt ei hun gyda llawer o gerddorfeydd y tu allan i Lundain, a holl brif gerddorfeydd Llundain o dan arweinwyr o fri fel Boult, Kempe, Haitink, Barenboim a Klemperer. Ar yr adeg hon, gweithiodd yn helaeth hefyd gyda Pierre Boulez yng Ngherddorfa Symffoni’r BBC. Mae gyrfa Skaila fel unawdydd wedi cynnwys llawer o berfformiadau consierto a darllediadau ar yr un pryd â gwaith llwyddiannus ym myd recordiau, ffilmiau a theledu – gan chwarae ar gyfer artistiaid fel Sinatra, Streisand, Elton John. Ym 1977 ffurfiodd Tommy Reilly a Skaila Kanga ddeuawd harmonica a thelyn, gan berfformio mewn cyngherddau ac ar y teledu ledled Prydain, gweddill Ewrop a De America. Yn ddiweddar, mae Skaila wedi arwain gweithdai cyfansoddwyr ym Mhrifysgol y Ddinas, Llundain a’r Academi Gerdd Frenhinol, lle bu’n Athro Telyn ers 1988. Yn ei gwaith gyda’r Nash Ensemble dros gyfnod o ugain mlynedd wedi derbyn clod gan lawer o feirniaid.

Bu Brian Raby, a astudiodd gyda Denis Wick, yn brif drombôn Cerddorfa Opera Cenedlaethol Cymru am fwy nag ugain mlynedd, ac ef oedd Cyfarwyddwr Cerdd Consort Pres Cymru. Mae’n is-brif drombôn gyda Cerddorfa Ffilharmonig Llundain ac mae’n dysgu’r trombôn, trwmped bas a’r repertoire operatig yn Ysgol Gelf a Drama Guildhall, Llundain. Mae Brian wedi hyfforddi ar lu o gyrsiau cerddorfa ieuenctid yn cynnwys Cerddorfa Ieuenctid Genedlaethol Prydain, Cerddorfa Ieuenctid Genedlaethol Cymru, Cerddorfa Ieuenctid Wiltshire a Band Pres Ieuenctid Cenedlaethol Cymru. Mae’r drefnydd cerddoriaeth bres toreithiog ac mae ei waith wedi derbyn canmoliaeth uchel gan y beirniaid. Mae Brian yn un o gyfarwyddwyr ALAW

Astudiodd Caryl Roese yn yr Academi Gerdd Frenhinol, Llundain ac ym Mhrisfygdol Cymru, Caerdydd lle enilodd radd M.Ed. A hithau wedi teithio’r byd a chael profiad helaeth oddysgu, mae Caryl bellach yn Bennaeth Cerdd yn Athrofa Addysg Uwch De Morgannwg, Cyncoed, Caerdydd lle mae’n arbenigo mewn hyfforddi myfyrwyr i fod yn athrawon cerdd cynradd ac uwchradd. Ei phrif nod erioed fu ehangu meddyliau cerddorol plant yn ifanc iawn a rhoi i bob plentyn gyfle i greu cerddoriaeth gyda chymaint o hwyl â phosib. Mae dwy gyfrol Caryl Roese, "Tôn Gron - A Pocketful of Rounds" a "Music for Topics and Projects" yn dystiolaeth fyw i’r egwyddor hon.

Astudiodd Jane Stewart gerddoriaeth ym Mhrifysgol Birmingham, Lloegr ac ers iddi raddio, mae wedi dysgu a chyfansoddi yn helaeth. Mae ei phrofiad o ddysgu disgyblion o bob oed wedi ei gwneud yn ymwybodol iawn o’r problemau maent yn eu hwynebu wrth ddysgu offeryn am y tro cyntaf. Mae Jane wedi gweithio gyda grwpiau offerynnol bach lle mae’n gyfarwydd â her chwarae ensemble – mater cwbl wahanol i chwarae’r rhannau ar eu pen eu hunain! Fel cyfeilydd, mae Jane yn deall y problemau yngyn â chwarae pob offeryn cerddorfa a band, ac mae wedi bod yn dyst i ymdrechion ei mab ei hun yn dysgu’r trwmped!! Yn ymwybodol o’r anawsterau technegol dechreuol, testun siom iddi oedd darganfod yn fuan iawn fod prinder cerddoriaeth ensemble sy’n hwyl i’w chwarae i’r dechreuwr. Nod ei chyfansoddiadau a’i threfniadau hi yw annog dysgwyr i chwarae a gwrando ar yr un pryd.

Ganed Robert Swain yng Nghaerdydd ym 1947. Bu’n ddisgybl i Alun Hoddinott ac Arnold Whittall tra’n astudio cerddoriaeth yng Ngholeg Prifysgol Cymru, Caerdydd. Wedi graddio aeth i ddysgu a darlithio ac yn 1989 fe’i apwyntiwyd yn Arolygwr Addysg ac Hyfforddiant ei Mawrhydu (Cymru). Er ei swydd yn y gyfundrefn addysg mae e’n cyfansoddi cymysgedd eang o gerddoriaeth.Yn sgil cael ei gomisiynnu gan Gomisiwn Blwyddyn Gerddorol Ewrop y BBC yn yr 1970au ar 1980au, mae ei waith wedi cael ei berfformio yng Ngwyl Dewi Sant BBC Cymru, Gwyl Abertawe, Gwyl Bro Morgannwg, yn ogystal â phrif neuaddau cyngerdd Llundain. Ymhlith y cerddorion sydd wedi perfformio ei gyfansoddiadau y mae Pedwarawd Llinynnol Dartington ac Endellion, "The Fires of London" dan arweiniad Peter Maxwell Davies, Cerddorfa Symffonig BBC Cymru dan arweiniad James Lockhart, Ensemble 20fed Ganrif Llundain dan arweiniad Edwin Roxburgh, ac hefyd Consort Pres Cymru o Gerddorfa Opera Cenedlaethol Cymru. Darlledwyd y mwyafrif o’r cyfansoddiadau comisiwn yma ar Radio 3 y BBC. Mae cyfansoddiadau cyfoes Robert Swain wedi profi’n llwyddiannus boed ar gyfer radio, teledu, theatr, neu ddramâu plant.